முதுவை ஹிதாயத் பக்கம்

கீழக்கரை தாசிம்பீவி அப்துல் காதர் பெண்கள் கல்லூரி பட்டமளிப்பு விழா நடைபெற்றது. இதில் உடல் ஊனமுற்ற, கண் பார்வையற்ற மாணவிகள் பட்டம் பெற்றனர்.

பட்டமளிப்பு விழா

கீழக்கரையில் உள்ள தாசிம்பீவி அப்துல் காதர் பெண்கள் கல்லூரி யின் 16-வது பட்டமளிப்பு விழா கல்லூரி வளாகத்தில் நடைபெற்றது. கல்லூரி தாளாளர் டாக்டர் ரகுமத்நிஷா ரகுமான் வரவேற்றார். கல்லூரி முதல்வர் பேராசிரியர் சுமையா தாவூது பட்டமளிப்பு நிகழ்ச்சியை தொடங்கி வைத்தார். மதுரை மண்டல கல்லூரி கல்வித்துறை இணை இயக்குனர் டாக்டர் உதய பாஸ்கரன் மாணவிகளுக்கு பட்டங்களை வழங்கினார்.

பி.ஏ., பி.காம், பி.எஸ்.சி., மற்றும் எம்.ஏ., எம்.காம்., எம்.எஸ்.சி., உள்பட இளநிலை மற்றும் முதுகலை பட்டம் பெற்ற 174 மாணவிகளுக்கு சான்றிதழ் வழங்கினார். இதில் எம்.காம்., படித்த இருகால்களும் ஊனமுற்ற உமா மகேசுவரி என்ற மாணவி தவழ்ந்து வந்து பட்டத்தை பெற்றுக்கொண்டார்.

சாதனை

கண் பார்வை இழந்த ஆயிஷா தஸ்லிமா என்ற மாணவி எம்.ஏ., ஆங்கிலம் பாடத்தில் பல்கலைக் கழக அளவில் முதலாவது ரேங்க் பெற்று தங்கப்பதக்கம் பெற்றார். உடல் ஊனமுற்ற மற்றும் கண் பார்வையற்ற மாணவிகள் பட்டம் பெற்றதை அனைவரும் பாராட்டினார்கள். காரைக்குடி அழகப்பா பல்கலைக்கழக அளவில் 30 மாணவிகள் ரேங்க் பெற்றனர். இவர்கள் அனைவருக்கும் பதக்கம் வழங்கப்பட்டது. எம்.ஏ. ஆங்கிலம் பாடத்தில் பல்கலைக்கழக அளவில் முதல் 10 ரேங்க்களையும் இந்த கல்லூரி மாணவிகளே பெற்றனர்.

விழாவில் கல்லூரி கல்வி துறை இணை இயக்குனர் உதய பாஸ்கரன் பட்டமளிப்பு உரை யாற்றி பேசியதாவது:- பெண்கள் சமுதாய முன்னேற்றத்திற்காக அரசு எண்ணற்ற திட்டங்களை நிறைவேற்றி வருகிறது. பெண்கள் கல்விக்காக அரசு கோடிக்கணக்கில் செலவிட்டு வருகிறது. ராமநாதபுரம் மாவட்டத்தில் பின் தங்கிய பகுதியில் அமைந்துள்ள இந்த கல்லூரி பெண்களின் கல்லூரி கல்விக்கனவை நிறை வேற்றி வருகிறது. இதற்காக இப்பகுதி மக்கள் இந்த கல்லூரி நிர்வாகிகளுக்கு நன்றிக்கடன் பட்டுள்ளனர். எனவே தான் இப்படிப்பட்ட பெண்களுக்கான நிறுவனங்களை அரசு ஊக்குவித்து வருகிறது.

பெருமை

உலகின் சிறந்த கல்வியாளர்கள் இந்தியாவில் தான் உள்ளனர். வலிமையான பாரதம் பெண்களின் கையில் தான் உள்ளது. இவ்வளவு பெண்களை பட்ட தாரியாக்கிய ஆசிரியர்களுக்குத் தான் இதன் பெருமை சேரும். பெண்களை சக்தி என்று நம் நாட்டில் அழைக்கிறோம். ஏனெனில் பெண்கள் கையில் தான் நாட்டை, குடும்பத்தை, சமுதாயத்தை முன்னேற்றும் சக்தி உள்ளது. பத்திரிகை துறை, கம்ப்யூட்டர் துறையில் பெண்கள் சாதனை பாராட்டுக்கு உரியது.

இவ்வாறு அவர் பேசினார். விழாவில் சீதக்காதி அளக்கட்டளை செயலாளர் காலித் ஏ.கே.புகாரி, சுலைமான் ஆலிம், அறக்கட்டளை தலைவர் சாகுல் ஹமீது ஆலிம், சீதக்காதி அறக் கட்டளையின் பெண்கள் கல்வி இயக்குனர் செரீபா அஜீஸ், துணை பொது மேலாளர் சேக் தாவூது, யூசுப் சுலைஹா மருத்துவமனை நிர்வாகி டாக்டர் செய்யது அப்துல் காதர் உள்பட ஏராளமான மாணவிகளும், பெற்றோர்களும் திரளாக கலந்து கொண்டனர். மாணவி சூர்யா நன்றி கூறினார்.

ராமநாதபுரம் அருகே பெரிய பட்டினம் கிராமத்தில் புற்றுநோய் காரணமாக சுமார் 100 பேர் மரண மடைந்துள்ளனர். வெடிவீசி பிடித்த மீன்களை சாப்பிட்டதாலேயே இந்த நோய் ஏற்பட்டதாக கூறப்படுகிறது.

நாட்டு நலப்பணி முகாம்

ராமநாதபுரம் மாவட்டம் கீழக்கரை அருகே உள்ளது பெரியபட்டினம் மீனவ கிராமம். இந்த ஊரை சேர்ந்த பலர் படித்து ஐ.ஏ.எஸ்., ஐ.எப்.எஸ். அதிகாரிகளாகவும், டாக்டர், விஞ்ஞானிகளாகவும் ஆகியுள்ளனர்.

இந்த ஊரில் சமீபத்தில் கீழக்கரை தாசிம்பீவி அப்துல்காதர் பெண்கள் கல்லூரி சார்பில் நாட்டு நலப்பணித்திட்ட முகாம் நடந்தது. இந்த கல்லூரி மாணவிகள் மருத்துவ விழிப்புணர்வு குறித்த பிரசாரம் செய்தபோது, அந்த ஊரில் பலர் புற்றுநோய் இறந்திருப்பதாக பொது மக்கள் தெரிவித்தனர். நாட்டுநலப்பணி முகாமுக்காக சென்ற கல்லூரி பேராசிரியைகள் வாசுகி, ஜானகி ஆகியோர் நிருபர்களிடம் கூறியதாவது:- நாங்கள் பெரியபட்டினம் சென்றிருந்த போது, அந்த ஊர் மக்கள் கூறிய தகவல்கள் எங்களை அதிர்ச்சிக்கு உள்ளாக்கியது. அங்கு பெரும்பாலோனார் புற்று நோயால் பாதிக்கப்பட்டுள்ளனர். கடந்த ஓராண்டு காலத்தில் மட்டும் 30க்கும் மேற்பட்டோர் இந்த நோயால் இறந்துள்ளனர். 3 ஆண்டுகளில் சுமார் 100க்கும் மேற்பட்டவர்கள் இறந்திருக்கலாம் என்று கருதுகிறோம்.

இறந்தவர்களில் பெரும்பாலானோர் 40 முதல் 50 வயதுக்கு உட்பட்டவர்கள். இந்த ஊரில் பலர் புற்றுநோயால் பாதிக்கப் பட்டிருந்தாலும் அதுபற்றி சரிவர தெரியாததாலும், வெட்கப்பட்டும் வெளியே சொல்ல மறுக்கின்றனர். இவ்வாறு அவர்கள் கூறினர்.

டாக்டர் ஆய்வு

இதனை அறிந்தகல்லூரி முதல்வர் சுமையா தாவூது, மதுரை பெரிய ஆஸ்பத்திரி புற்றுநோய் பிரிவு டாக்டர். மோகன் பிரசாத்திடம் இது பற்றி தெரிவித்தார். இதனை தொடர்ந்து டாக்டர். மோகன் பிரசாத் பெரியபட்டினம் வந்து, ஆய்வு செய்ததுடன், பொது மக்களுக்கு புற்றுநோய் குறித்து விளக்கி கூறினார்.

இதுபற்றி மதுரை புற்றுநோய் பிரிவு டாக்டர். மோகன் பிராத் கூறியபோது, "தவறான உணவு பழக்க வழக்கத்தினாலேயே புற்று நோய் பாதிப்பு அதிகம் ஏற்படுகிறது. இந்த பகுதி மக்கள் கடலில் வெடிவைத்து பிடிக்கும் மீன்களை வாங்கி சாப்பிடுவதாலும், அவ்வாறு பிடிக்கப்பட்டு விற்கப்படும் கருவாடுகளை சாப்பிடுவதாலும் புற்று நோய் பாதிப்புக்கு உள்ளாகி இருக்கலாம். இதுபற்றி அவர்களுக்கு மருத்துவ ரீதியான விழிப்புணர்வை ஏற்படுத்தி உள்ளோம்.

இவ்வாறு அவர் கூறினார்.

நன்றி: தினத்தந்தி