முதுகுளத்தூர் இஸ்லாமிய பயிற்சி மைய ஆண்டுவிழா மற்றும் பரிசளிப்பு விழா

 

ஐக்கிய முதுகுளத்தூர் முஸ்லிம் ஜமாஅத் ஆதரவுடன் முதுகுளத்தூரில் நடத்தப்பட்டு வரும் இஸ்லாமிய பயிற்சி மையத்தின் ஆண்டு விழா மற்றும் பரிசளிப்பு விழா 22.03.2008 சனிக்கிழமை மாலை பயிற்சி மைய வளாகத்தில் நடைபெற்றது.

 

விழாவிற்கு பெரிய பள்ளிவாசல் தலைமை இமாம் மௌலவி எஸ். அஹ்மது பஷீர் சேட் ஆலிம் தலைமை தாங்கினார். அமீரகப் பிரதிநிதி எம். பக்ருதீன் பாதுஷா முன்னிலை வகித்தார். திடல் பள்ளிவாசல் இமாம் எஸ். முஹம்மது ரபியுத்தீன் ஃபைஜி பாஜில் மன்பஈ இறைவசனங்களை ஓதினார்.

 

இஸ்லாமிய பயிற்சி மைய முதல்வர் ஹெச்.ஏ. சுல்தான் அலாவுதீன் வரவேற்புரை நிகழ்த்தினார்.

 

மாணாக்கர்கள் பி. பாவா பக்ருதீன், என். நஜிமா கனி ஆகியோர் வாழ்த்துரை வழங்கினர்.

 

மார்க்க போதனைத் தேர்வில் முதலாம், இரண்டாம் மற்றும் மூன்றாம் இடங்களைப் பெற்றவர்களுக்கு பரிசுகளை வழங்கி தேசிய நல்லாசிரியர் எஸ்.அப்துல் காதர் வாழ்த்துரை வழங்கினார்.

 

குர் ஆன் ஓதும் போட்டியில் முதலாம்,இரண்டாம் மற்றும் மூன்றாம் இடங்களைப் பெற்றவர்களுக்கு பரிசுகளை வழங்கி முதுவைக் கவிஞர் உமர் ஜஹ்பர் வாழ்த்துரை வழங்கினார்.

 

பத்தாம் வகுப்புத் தேர்வில் முதல் மூன்று இடங்களைப் பிடித்த மாணாக்கர்களுக்க்கு பரிசுகளை அரசு மருத்துவர் டாக்டர் எம். ஷேக் முஹம்மது மைதீன் பரிசுகளை வழங்கி வாழ்த்துரை நிகழ்த்தினார்.

 

ஒன்பதாம் வகுப்புத் தேர்வில் முதல் மூன்று இடங்களைப் பெற்றவர்களுக்கு பரிசுகளை பெரிய பள்ளிவாசல் உதவித் தலைவர் எம்.எம்.கே.எம். காதர் முகையதீன், பெரிய பள்ளிவாசல் உதவி இமாம் மௌலவி எஸ்.டி.ஷேக் முகைஅதீன் மன்பஈ, திடல் பள்ளிவாசல் உதவித் தலைவர் எம்.ஜஹ்பர் சாதிக் அலி, ஆசிரியர் ஏ. ஹபிப் முஹம்மது  உள்ளிட்டோர் வழங்கி வாழ்த்துரை வழங்கினர்.

 

உதவித் தலைமையாசிரியர் என். காஜா நிஜாமுதீன் குறைசி நன்றியுரை நிகழ்த்தினார்.

 

தகவல் : முதுவை ஹிதாயத்

துபாயில் இந்திய பல்கலை அறிமுகப்படுத்தும் புதிய பாடத்திட்டம்

 

துபாயில் செயல்பட்டு வரும் இந்தியப் பல்கலைக்கழகமான மணிப்பால் பல்கலைக்கழகம் புதிய பொறியியல் படிப்புகளை அறிமுகப்படுத்தியுள்ளது. வளைகுடாப் பிராந்தியத்தில் அதிகரித்து வரும் தேவையைக் கருத்தில் கொண்டு மனித வளம் தொடர்பான பாடங்கள் புதிய கல்வியாண்டு துவக்கத்தில் தொடங்கப்படும். மேலும் தகவல் தொழில்நுட்பம், உற்பத்தி மற்றும் கட்டிடக் கலை உள்ளிட்ட பல்வேறு துறைகளும் அறிமுகப்படுத்தப்படும்.

 

துபாய் அறிவு கிராம ( Dubai Knowledge Village ) எக்ஸியூடிவ் இயக்குநர் டாக்டர் அயூப் காஜிம், மணிப்பால் பல்கலைக்கழக இயக்குநர் டாக்டர் ராம்ஜி, மணிப்பால் கல்வி நிறுவன பிராண்ட் அம்பாஸிடரும், இந்திய கிரிக்கெட் அணி கேப்டன் அனில் கும்ளே உள்ளிட்டோர் கலந்து கொண்ட கூட்டத்தில் இவ்வறிவிப்பு வெளியிடப்பட்டது.

துபாயில் தமிழக இளைஞர் தற்கொலை

 

துபாய் புளு ஸ்கை நிறுவனத்தில் பணிபுரிந்து வந்த இராமநாதபுரம் மாவட்டம் முதுகுளத்தூரைச் சேர்ந்த அப்பாஸ் ஷேக் ( வயது சுமார் 21 ) 16.03.2008 ஞாயிறன்று பிற ஊழியர்கள் பணிக்குச் சென்ற நேரத்தில் பேனில் கயிறை மாட்டி தற்கொலை செய்துகொண்டதாக சக ஊழியர்கள் தெரிவித்தனர்.

 

எக்ககுடியைச் சேர்ந்த இவர்களது குடும்பம் தற்பொழுது முதுகுளத்தூரில் வசித்து வருகின்றனர்.

 

தனது மகன் துபாய் சென்று குடும்பத்திற்கு உதவியாக இருப்பான் என நினைத்த இவரது குடும்பத்தினருக்கு ஷேக்கின் மரணம் பெரும் அதிர்ச்சியை ஏற்படுத்தியுள்ளது. ஷேக்கிற்கு தகப்பனார், தாய், இரண்டு இளைய சகோதரர்கள் மற்றும் ஒரு சகோதரி ஆகியோர் இருக்கின்றனர்.

 

பிற ஊழியர்கள் பகலில் பணிக்குச் சென்று திரும்பி விட்டு அறைக் கதவைத் திறந்ததும் ஷேக் தூக்கில் தொங்கியது கண்டு அனைவரும் அதிர்ச்சியடைந்தனர்.

 

துபாய் காவல்துறை சடலத்தை கைப்பற்றி பிரேதப் பரிசோதனைக்கு அனுப்பி வைத்துள்ளனர். மேலும் விசாரணை நடைபெற்று வருகிறது. சமீபகாலமாக இந்திய தூதரக அலுவலகங்கள் பல்வேறு முயற்சிகள் எடுத்தும் இந்தியர் தற்கொலை விகிதம் படித்தவர், படிக்காதவர் என்ற பாகுபாடின்றி அதிகரித்து வருவது அதிர்ச்சியலைகளை இந்திய சமூகத்தினர் மத்தியில் ஏற்படுத்தியுள்ளது.

 

 

கத்தார் தலைநகர் தோஹாவில் முதல் கத்தோலிக்க சர்ச் திறப்பு

 

தோஹாவில் 15.03.2008 சனிக்கிழமை முதலாவது கத்தோலிக்க சர்ச் திறந்து வைக்கப்பட்டது. சர்ச் திறப்பு விழாவில் பத்தாயிரத்துக்கும் மேற்பட்ட மக்கள் பங்கேற்றனர். இவர்கள் 63 நாடுகளைச் சேர்ந்தவர்கள் என்பது குறிப்பிடத்தக்கது. ஒரு இலட்சத்திற்கும் மேற்பட்ட கத்தோலிக்கர்கள் தோஹாவில் பணிபுரிந்து வருகின்றனர்.

 

தோஹாவில் சர்ச் அமைத்து வழிபாடு செய்ய அனுமதித்தமைக்காக போப் பெனிடிக்ட் கத்தார் அமீர் ஷேக் ஹமத் பின் கலிஃபா அல் தானிக்கு வாழ்த்துக்களைத் தெரிவித்துள்ளார்.

 

சர்சைப் பார்வையிட்ட கத்தார் துணைப்பிரதமர் அப்துல்லாஹ் அல் அதிய்யாஹ் கத்தார் நாட்டிற்கு வருகை தர போப்பிற்கு அழைப்பு விடுத்துள்ளதாகக் குறிப்பிட்டார்.